Mae Coleg Gŵyr Abertawe yn cryfhau ei safle fel yr unig ddarparwr prentisiaethau gorchuddio lloriau yng Nghymru, trwy agor cyfleuster hyfforddi newydd sy’n canolbwyntio ar ddiwydiant gyda’r nod o ateb y galw cynyddol ar draws y diwydiant lloriau.
Mae’r gofod pwrpasol hwn, a leolir ar Gampws Llys Jiwbilî y Coleg yn Fforestfach, wedi cael ei ddatblygu i gefnogi addysgu prentisiaeth Gorchuddio Lloriau Lefel 2, rhaglen arbenigol sy’n rhoi sgiliau, arbenigedd technegol a phrofiad ymarferol i brentisiaid fel y gallant symud ymlaen yn y grefft.
I nodi’r agoriad, bydd y Coleg hefyd yn agor ei ddrysau i gyflogwyr, gan eu gwahodd i alw heibio ac archwilio’r cyfleusterau newydd yn uniongyrchol ar ddydd Mercher 13 Mai. Gallwch gadw lle trwy ddefnyddio’r ddolen hon.
Crëwyd y cyfleuster newydd hwn er mwyn ymateb yn uniongyrchol i'r galw cynyddol gan gyflogwyr a'r sector ehangach. Mae'n cynnig amgylchedd pwrpasol (o safon y diwydiant) lle gall dysgwyr fireinio ar eu technegau, ennill profiad ymarferol ac uwchsgilio yn unol ag arferion proffesiynol cyfredol.
Fel yr unig ddarparwr sy’n cynnig y brentisiaeth hon yng Nghymru, mae’r Coleg yn parhau i chwarae rôl hollbwysig wrth fynd i’r afael â bylchau sgiliau a chefnogi datblygiad y gweithlu ar draws y diwydiant.
Dywedodd Lucy Bird, Rheolwr Masnachol Coleg Gŵyr Abertawe:
“Mae agor y cyfleuster newydd hwn yn gam sylweddol ymlaen i'r Coleg. Fel unig ddarparwr y brentisiaeth hon yng Nghymru, mae gennym gyfrifoldeb i sicrhau'r safonau uchaf posib o ran cynnig hyfforddiant a chymorth i'n dysgwyr a'n cyflogwyr. Mae'r cyfleuster pwrpasol hwn yn caniatáu i'n hyfforddwyr ddarparu addysgu ymarferol a pherthnasol i'r diwydiant sy'n adlewyrchu gweithleoedd go iawn, tra hefyd yn rhoi hyder i gyflogwyr drwy sicrhau bod eu staff yn datblygu'r sgiliau sydd eu hangen i lwyddo."
Ychwanegodd Neil Brayshaw, Cyfarwyddwr Dros Dro Dysgu Seiliedig ar Waith y Coleg:
"Mae Coleg Gŵyr Abertawe yn falch iawn o gynnig y cyfleuster newydd hwn o safon y diwydiant i gefnogi anghenion sgiliau o fewn y diwydiant gosod lloriau. Rydym yn edrych ymlaen at groesawu cyflogwyr i'n diwrnod galw heibio i arddangos y cyfleuster newydd, trafod gofynion sgiliau gyda'n tîm darparu ac arwain, yn ogystal ag ateb cwestiynau ynghylch sut y gallwn gefnogi twf eich busnes trwy hyfforddiant a phrentisiaethau pwrpasol."
Dywedodd Keith Aspinwall o Heritage Carpet and Flooring Ltd:
"Rwy’n falch iawn o weld Coleg Gŵyr Abertawe yn cynnig prentisiaeth mewn gosod lloriau. Rydyn ni wedi bod yn aros i rywun gynnig cymhwyster o’r fath o fewn y diwydiant ers tro byd. Fe wnes i recriwtio prentis 18 mis yn ôl ac rwy'n falch iawn o ddweud ei fod wedi bod yn mynd o nerth i nerth dan hyfforddiant y tîm, ac rydw i’n derbyn adborth bob mis.
Mae'r brentisiaeth yn cynnwys ystod eang o dasgau fel hunan-lefelu lloriau gorffenedig ac ati, a byddwn yn bendant yn annog cyflogwyr i gofrestru prentisiaid ar y cwrs."
Digwyddiad galw heibio cyfleuster gorchuddio lloriau
Gall cyflogwyr drefnu amser cyfleus rhwng 9am a 4pm ar ddydd Mercher 13 Mai, i weld y cyfleuster ar Gampws Llys Jiwbilî, cwrdd yn uniongyrchol â’r tîm addysgu a thrafod y rhaglen brentisiaeth, gofynion eu gweithlu, a’r cymorth sydd ar gael i gyflogwyr yn y Coleg.
Gallwch fwcio lle ar y diwrnod galw heibio drwy ddefnyddio'r linc hon.
Dyma gyfle gwerthfawr i fusnesau archwilio sut y gall prentisiaeth mewn gorchuddio lloriau ddatblygu sgiliau gweithwyr a chynnig ffordd hirdymor o hybu twf.
Am ragor o wybodaeth neu fanylion am y sesiwn galw heibio ar 13 mai, e-bostiwch training@gcs.ac.uk neu ffoniwch 01792 284400.