Yn ddiweddar, fe wnaeth Coleg Gŵyr Abertawe groesawu Taith Gyfnewid Fflam Tîm Cymru i Gampws Tycoch, gan ymuno â sefydliadau ledled Cymru i gydnabod cyflawniadau, uchelgais ac ymroddiad y dysgwyr, y prentisiaid a’r bobl ifanc sy’n cynrychioli Tîm Cymru.
Mae Taith Gyfnewid y Fflam yn teithio ar hyd a lled y genedl cyn Rowndiau Terfynol Cenedlaethol WorldSkills UK eleni, a gynhelir yng Nghymru rhwng 16 a 20 Tachwedd. Mae’r daith gyfnewid yn taflu goleuni ar y bobl, y partneriaethau a’r cyfleoedd sy’n helpu i ddatblygu sgiliau o’r radd flaenaf, tra’n ysbrydoli cenedlaethau’r dyfodol i ystyried addysg alwedigaethol, prentisiaethau a chystadlaethau sgiliau.
Yng Ngholeg Gŵyr Abertawe, y fflam oedd y prif ffocws yn ystod seremoni arbennig a oedd yn cynnwys disgyblion o ysgolion cynradd lleol Cadle, y Gors a Sgeti. Daeth hi â dysgwyr, prentisiaid, cyflogwyr, tiwtoriaid, staff a phartneriaid cymunedol at ei gilydd i arddangos sgiliau, dathlu llwyddiant ac ysbrydoli cystadleuwyr y dyfodol.
Roedd y disgyblion yn gallu mwynhau amrywiaeth o weithgareddau o bob maes yng nghwricwlwm y Coleg gan gynnwys harddwch, busnes, gofal plant, cyfrifiadura, adeiladu, celfyddydau creadigol, cyfryngau creadigol, peirianneg electronig, e-chwaraeon, ffasiwn, gwyddor fforensig, lletygarwch, tirlunio, cerddoriaeth, plymwaith, colur theatrig, teithio a thwristiaeth, y celfyddydau gweledol a’r Gymraeg.
Roedd y digwyddiad hefyd yn cydnabod llwyddiannau enillwyr medalau ddoe a heddiw, a gofynnwyd i Kaya Quinn (Arian - Electroneg Diwydiannol) ac Eva Robins (Arian - Sgiliau Sylfaen: Gwasanaethau Bwyty) gario’r fflam ar ran y Coleg.
Eleni, mae pum dysgwr o’r Coleg – Kaya, Rhys Freeman, Kobi Williams, Marley Blakemore a Steve Sebastian – wedi cael eu dewis i gystadlu yn Rowndiau Terfynol Cenedlaethol WorldSkills UK, gan arddangos cryfder talent leol a thynnu sylw at y cyfleoedd sydd ar gael drwy gystadlaethau sgiliau, prentisiaethau a dysgu galwedigaethol.
Dan arweiniad Llywodraeth Cymru a’r prosiect Ysbrydoli Rhagoriaeth Sgiliau yng Nghymru, mae Taith Gyfnewid y Fflam yn helpu i ddod â stori WorldSkills i gymunedau ledled Cymru, gan dynnu sylw at yr effaith gadarnhaol y mae cystadlaethau sgiliau yn ei chael ar hyder, dilyniant gyrfa a chyfleoedd yn y dyfodol.
Bydd Taith Gyfnewid y Fflam yn ymweld â cholegau, darparwyr hyfforddiant a sefydliadau partner ledled Cymru, gan ddathlu straeon llwyddiant lleol wrth adeiladu cyffro cyn y Rowndiau Terfynol Cenedlaethol ym mis Tachwedd.
Dywedodd Pennaeth y Coleg, Paul Kift:
“Roedd yn wych croesawu pawb i Dycoch i weld y Fflam wrth iddi basio trwy Goleg Gŵyr Abertawe ar ei thaith ar hyd a lled Cymru.
“Rydyn ni’n gobeithio bod disgyblion yr ysgolion wedi cael eu hysbrydoli gan yr amrywiaeth o weithgareddau a gynigir a’u bod wedi gadael gydag ymdeimlad o gyffro am yr holl lwybrau gyrfa posibl sydd ar gael iddynt. Efallai y bydd yna enillwyr medalau y dyfodol yn eu plith!
“Rydyn ni mor falch o’n holl fyfyrwyr sydd wedi cymryd rhan mewn cystadlaethau sgiliau dros y blynyddoedd, mae gennym hanes gwych o ran cipio medalau aur, arian ac efydd.
“Roedd yn anrhydedd i ni groesawu Taith Gyfnewid y Fflam i Goleg Gŵyr Abertawe eto. Rydyn ni nawr yn edrych ymlaen at Rowndiau Terfynol Cenedlaethol y DU a hoffem ddymuno pob lwc i’n holl gystadleuwyr ar gyfer y digwyddiad.”
Diolch yn fawr i’r sefydliadau a’r cyflogwyr a gefnogodd y digwyddiad, gan gynnwys Andrew Scott, Simon Thomas a Spot the (Robot) Dog o Brifysgol Cymru y Drindod Dewi Sant, Renishaw a Chyngor Abertawe.