Mae gennym enw cryf eisoes am addysg bellach ond a wyddoch chi fod dros gant o bobl bob blwyddyn yn astudio ar gyfer cymhwyster addysg uwch (AU) gyda ni? Rydym yn cynnig Graddau, Graddau Sylfaen, Tystysgrifau Cenedlaethol Uwch (HNC), Diplomas Cenedlaethol Uwch (HND), Tystysgrif Addysg Uwch (TystAU) a chymwysterau proffesiynol – gyda sefydliadau addysg uwch blaenllaw yng Nghymru yn dilysu llawer o’n cyrsiau.
Rydym wedi agor Canolfan Prifysgol bwrpasol ar Gampws Tycoch yn ddiweddar. Fe’i dyluniwyd i fyfyrwyr sy’n dilyn cyrsiau ar lefel uwch ac mae’n cynnwys chwe ystafell ddosbarth newydd, llyfrgell ac ardal ystafell gyffredin.
Os oes gennych unrhyw ymholiadau ynglyn ag astudio cwrs AU yng Ngholeg Gŵyr Abertawe, ebostiwch Beth Hughes on bethan.hughes@gcs.ac.uk.
Ymunwch â ni yn ein Diwrnod Agored Rhithwir Addysg Uwch ddydd Gwener nesaf, 14 Awst. Sgwrsiwch ar-lein gyda’n tîm AU gwybodus am gyrsiau, amseroedd dosbarth a sut y bydd Covid-19 yn effeithio ar ddysgu.
Cliciwch ar y cylch glas sydd ar ochr dde, gwaelod y sgrin os gwelwch yn dda.
Pam astudio AU gyda ni?
Rhagolygon gyrfa gwell
Dulliau addysgu hyblyg
Darlithwyr â phrofiad o fyd diwydiant
Canolbwyntio ar yr elfen alwedigaethol
Cyfle i ychwanegu i gael gradd anrhydedd
Dosbarthiadau llai o faint
Cysylltiadau cryf â diwydiant
Digon o gymorth
Arbed amser ac arian
Dilysiad prifysgol
Canolfan AU benodedig
Cyfleoedd lleoliadau gwaith
Sut i wneud cais
Gallwch wneud cais am gwrs AU rhan-amser trwy'r Coleg.
Os yw'r cwrs y mae gennych ddiddordeb ynddo yn amser llawn ac mae rhif UCAS ganddo, rhaid i chi fynd trwy wefan UCAS.
Os oes angen help arnoch i lenwi ffurflen gais UCAS, gallwch wylio'r fideo defnydiol hwn.
Cyllid ar gyfer cyrsiau AU
Os ydych yn ystyried gwneud cais am gwrs AU bydd rhaid i chi gael gwybodaeth am eich opsiynau cyllid.
Gwybodaeth am gyllid myfyrwyr ar gyfer y flwyddyn academaidd 2020-2021
P’un ai ydych yn astudio cwrs Addysg Uwch yn amser llawn neu’n rhan-amser, gallech chi fod yn gymwys i gael benthyciadau a/neu grantiau i helpu gyda’ch costau.
Myfyrwyr ag anableddau neu anghenion dysgu ychwanegol
Os oes gennych anabledd neu anghenion dysgu ychwanegol, efallai y byddwch yn gallu cael cymorth ariannol ychwanegol.
Fel rhan o’r broses ymgeisio bydd rhaid i chi ddod i gyfarfod asesu anghenion a bydd canlyniad y cyfarfod yn cael ei anfon i’r Coleg ar eich rhan. Bydd yr asesiad yn cael ei gynnal yn eich canolfan asesu anghenion lleol e.e. Prifysgol Abertawe.
Os oes gennych unrhyw gwestiynau am y broses, eich cysylltiadau yng Ngholeg Gŵyr Abertawe yw Ceri Low (Cydlynydd Cymorth Dysgu) ar 01792 284237 / ceri.low@gcs.ac.uk neu Hilary Langston (Cymorth Dysgwyr h.y. cymorth dylecsia) ar 01792 284203 / hilary.langston@gcs.ac.uk
Myfyrwyr rhan-amser
Gallech chi fod yn gymwys i gael Grant Dysgu Llywodraeth Cymru a/neu fenthyciad cynhaliaeth i helpu gyda’ch cwrs rhan-amser.
Myfyrwyr â phlant neu oedolion dibynnol
Darganfyddwch a ydych yn gymwys i gael cymorth ariannol ychwanegol os oes gennych blant neu oedolyn sy’n dibynnu arnoch yn ariannol.
Cymorth gyda chostau cludiant
Gall ein myfyrwyr AU brynu tocyn bws y gellir ei ddefnyddio i gyrraedd a gadael y Coleg a gellir ei ddefnyddio hefyd gyda’r hwyr ac ar benwythnosau ar fysys First Cymru.
Mae’r tocyn bws yn ddilys o fis Medi tan ddiwedd mis Mehefin dim ond ar gyfer ardaloedd Abertawe, Castell-nedd Port Talbot a Chaerfyrddin ac mae’n costio £300.
Cynllun rhandaliadau (gyda ffi weinyddu £15)
- • Rhandaliad 1 - £165
- • Rhandaliad 2 - £150 siec ôl-ddyddiedig ar gyfer 06/01/21
Gellir prynu tocynnau bws o’r adran Gwasanaethau Myfyrwyr ar ôl cofrestru.
Bwrsari Coleg Gŵyr Abertawe
Mae’r Coleg yn rhoi bwrsari ym mhob blwyddyn ar gyfer yr holl fyfyrwyr AU amser llawn sy’n astudio ar raglen wedi’i breinio o sefydliad AU. Ar gyfer yr holl gyrsiau sydd wedi’u breinio o Brifysgol mae’r bwrsari yn £1,000 y flwyddyn. Ar gyfer yr holl gyrsiau sydd wedi’u dilysu gan Brifysgol mae’r bwrsari yn £500 y flwyddyn.
Cronfa galedi
Os yw aros am eich cyllid myfyriwr yn achosi caledi i chi rhowch wybod i’ch tiwtor cwrs/arweinydd rhaglen cyn gynted ag y bo modd. Os ydych yn diwallu’r meini prawf gosod, gallech fod yn gymwys i gael y gronfa galedi i fyfyrwyr.
Seremoni Graddio Addysg Uwch 2019
Addysg Uwch wedi'i hesbonio
Graddau Sylfaen
Mae Graddau Sylfaen yn gymwysterau lefel gradd sy'n cyfuno astudiaethau academaidd â dysgu yn y gweithle.
Wedi'u cynllunio ar y cyd â chyflogwyr, mae'r cymwysterau hyn yn rhoi'r sgiliau, yr wybodaeth a'r ddealltwriaeth berthnasol i bobl gan arwain at ganlyniadau academaidd yn ogystal â gwella perfformiad a chynhyrchedd yn y gweithle.
Mae graddau sylfaen yn canolbwyntio ar swydd neu broffesiwn arbennig.
Eu nod yw gwella sgiliau proffesiynol a thechnegol staff presennol neu ddarpar staff o fewn proffesiwn, neu'r rhai sy'n bwriadu ymuno â'r proffesiwn hwnnw.
Maen nhw'n cyfateb i ddwy ran o dair o radd anrhydedd lawn ac yn gymhwyster hollol hyblyg sy'n caniatáu i fyfyrwyr astudio'n rhan-amser neu'n amser llawn i weddu i'w ffordd o fyw. Fel arfer bydd hi'n cymryd tua dwy flynedd i gwblhau gradd sylfaen amser llawn, a gall gymryd yn hwy i gwblhau cyrsiau rhan-amser.
Mae dewis i ychwanegu at y cymhwyster i gael gradd anrhydedd lawn ar y diwedd. Fel rheol bydd hyn yn cymryd blwyddyn ychwanegol.
HNCs/HNDs
Mae Tystysgrifau Cenedlaethol Uwch (HNC) a Diplomâu Cenedlaethol Uwch (HND) yn gyrsiau cysylltiedig â gwaith sydd fel arfer yn ceisio paratoi myfyrwyr ar gyfer gyrfa benodol.
Yn wahanol i nifer o gyrsiau gradd, maen nhw'n canolbwyntio ar yr elfen alwedigaethol ac felly gallan nhw arwain yn syth at yrfa.
Maen nhw'n gam gwych hefyd at gymhwyster addysg uwch a gallwch 'ychwanegu atynt' a'u troi nhw'n radd Bagloriaeth. Mae HNC un lefel yn is na HND ac fel arfer mae'n cyfateb i flwyddyn gyntaf prifysgol.
Mae HND yn gyfwerth ag ail flwyddyn prifysgol.
Mae'n cymryd blwyddyn i gwblhau HNC amser llawn (dwy flynedd yn rhan-amser) ac mae'n cymryd dwy flynedd i gwblhau HND yn amser llawn (tair i bedair blynedd yn rhan-amser).
Cymwysterau Proffesiynol
Mae cymwysterau proffesiynol wedi'u cysylltu'n benodol â rhai dewisiadau gyrfa arbennig ac wedi'u cydnabod gan y cyrff proffesiynol perthnasol (megis CMI, CIM, CIPD).
Mae ardystio proffesiynol yn profi bod gan rywun yr wybodaeth, y profiad a'r sgiliau i berfformio swydd benodol, a'i fod wedi cyflawni lefel gydnabyddedig o gymhwysedd.
Gall ennill cymhwyster proffesiynol gynnig manteision megis cael eich derbyn i'r yrfa o'ch dewis, a dyrchafiad neu gynnydd mewn cyflog.
Tystysgrif Addysg Uwch (TystAU)
Mae tystysgrif addysg uwch yn gymhwyster annibynnol sy’n canolbwyntio ar naill ai proffesiwn penodol neu bwnc academaidd. Fel Lefel 4 dyma’r cymhwyster isaf y gall myfyriwr ei ennill mewn addysg uwch. Mae’n gymhwyster academaidd yn hytrach na chymhwyster galwedigaethol.
Mae cwblhau TystAU yn gallu dangos gallu unigolion i astudio ar lefel prifysgol. Gall godi hyder, cefnogi newid gyrfa, neu ddilyniant mewn gyrfa bresennol. Gellir ei ddefnyddio hefyd fel cam cyntaf sawl lefel gradd i fynd ymlaen i ennill gradd sylfaen, diploma Addysg Uwch (DipAU) neu radd anrhydedd lawn trwy astudiaethau ychwanegol. Gallai TystAU fod yn ddefnyddiol ar gyfer cael swydd, yn dibynnu ar y proffesiwn, gan ei bod yn gyfwerth â chymwysterau eraill.
Gallwch ddefnyddio TystAU fel cam tuag at radd lawn, ac mae’n bosibl y byddwch yn gallu hepgor blwyddyn ar gwrs gradd. Mae’n rhaid i chi sicrhau eich bod yn diwallu gofynion mynediad y cwrs y mae gennych ddiddordeb ynddo o hyd, a holi i weld a oes modd trosglwyddo’ch astudiaethau blaenorol.
Wedi gadael yr ysgol heb gymwysterau?
Eisiau newid gyrfa?
Mae'r Diploma Mynediad i Addysg Uwch (AU) yn gymhwyster sy'n paratoi pobl heb gymwysterau traddodiadol i astudio cyrsiau addysg uwch. Mae ar gyfer y rhai a hoffai astudio ym maes addysg uwch sydd wedi gadael yr ysgol heb gymwysterau fel Safon Uwch neu sydd wedi mynd yn syth i fyd gwaith ond nawr sydd am newid gyrfa. Mae cyrsiau Mynediad yn denu amrywiaeth o fyfyrwyr ac nid oes terfyn oed uchaf. Unwaith y bydd wedi’i gwblhau, mae gan y diploma yr un statws â Safon Uwch. Mae cyrsiau Mynediad yn gyffredinol yn cael eu teilwra fel llwybrau; maen nhw’n rhoi’r sgiliau angenrheidiol i’r myfyrwyr ac yn rhoi'r wybodaeth briodol sydd ei hangen ar gyfer gyrfa israddedig benodol. Er enghraifft mae llwybrau 'mynediad i'r gyfraith', 'mynediad i les cymdeithasol’ a 'mynediad i nyrsio'.
