Gradd Sylfaen Ymarfer Datblygiad Plentyndod (Cwrs gyda’r hwyr)

Corff llywodraethu: Prifysgol Cymru Y Drindod Dewi Sant

Bydd y cwrs hwn yn destun ail-ddilysu.

Mae’r ffordd y mae plant yn datblygu, meithrin perthnasoedd a gwneud synnwyr o’r byd yn cael ei siapio gan ofalwyr, teulu, diwylliant, iaith, amgylchedd a phrofiad, yn gydamserol yn amlach na pheidio. Mae’r Radd Sylfaen hon yn cynnig gwybodaeth broffesiynol i ddysgwyr fel y gallant ddeall y dylanwadau hyn ac ymateb iddynt mewn modd hyderus.

Mae’r cwrs yn addas ar gyfer unigolion sy’n gweithio mewn rolau amser llawn o fewn y sector gofal plant, gan gynnwys ysgolion cynradd ac uwchradd. Mae hefyd yn addas ar gyfer cynorthwywyr dysgu (CD), cynorthwywyr cymorth dysgu (CCD) a staff blynyddoedd cynnar, ac oherwydd ein bod yn cynnig y cwrs gyda’r nos, byddwch yn cael cyfle i astudio ochr yn ochr â’ch swydd, gan gymhwyso’r wybodaeth rydych chi’n ei ddysgu o fen eich rôl.

Mae’r rhaglen yn cwmpasu testunau eang iawn mewn perthynas ag astudiaethau plentyndod: theori datblygiad plant, diogelu, iechyd a lles, cynhwysiant ac ymarferoldebau arwain tîm. Byddwch yn cael eich addysgu mewn grŵp bach, rhyngweithiol a chefnogol dan arweiniad gweithwyr proffesiynol a phrofiadol o fewn y sector gofal plant, a byddwch hefyd yn elwa o gymorth ychwanegol mewn perthynas â sgiliau astudio.

Mae’r cwrs yn cyfuno gwaith theori ag ymarfer yn y byd go iawn, ac mae’n ffordd o ddatblygu sgiliau a gwybodaeth gyfredol y mae cyflogwyr yn y sector addysg yn chwilio amdano. Rydyn ni’n cynnig cyfle i ddysgu mewn grwpiau bach a chefnogol, sy’n rhoi cyfle i chi fagu hyder fel y gallwch gyfrannu, rhannu profiadau a dysgu’r arferion oddi wrth gydweithwyr a thiwtoriaid. Mae hyblygrwydd y rhaglen yn eich galluogi i gydbwyso gwaith amser llawn ag astudiaethau academaidd, ac mae’r cymorth ychwanegol sydd ar gael, boed yn addysgol neu yn gymorth bugeiliol, yn sicrhau nad yw myfyrwyr yn teimlo’n unig ar unrhyw adeg ar eu taith. Yn ogystal, bydd myfyrwyr cymwys yn cael cyfle i dderbyn bwrsari gwerth £1000.

"Wrth gynnig y cwrs hwn, rydw i wedi gweld dilyniant gyrfa go iawn, gyda myfyrwyr yn sicrhau dyrchafiadau a chyfleoedd newydd o ganlyniad i natur ymarferol y rhaglen. Mae’r llwybr dilyniant clir i astudio graddau ychwanegol, hyd yn oed TAR, yn agor y drws i ddatblygiad gyrfa hirdymor.”  - Katie Thomas, Arweinydd y Rhaglen

“Wnes i wir fwynhau mynd yn ôl i astudio ar ôl cael fy mhlant. Roedd y profiad cyfan yn fuddiol, a wnes i fagu hyder yn fy hun o ganlyniad. Roedd y tiwtoriaid yn rhagorol o ystyried yr holl gymorth wnaethon nhw gynnig ar hyd y ffordd a’u hanogaeth pan oedd pethau’n anodd. Roedd y cwrs yn ddiddorol ac yn ysbrydoledig a dwi mor falch i mi gofrestru.” -Joann Hughes, Myfyriwr. 

Mae’r cwrs L4/5 yn gyfystyr â dwy flynedd o gwrs BA. Os ydych chi am astudio ymhellach byddwch yn symud ymlaen i flwyddyn olaf cwrs gradd anrhydedd mewn Addysg Gynhwysol, Addysg Blynyddoedd Cynnar neu Waith Ieuenctid / Gofal.

Cod UCAS: 5G12